Fuhrehof-Wiiber
... isch es mehrheitlich freiliechtigs Theaterstück mit läbiger Musig, Gsang, u öppedie süscheme Spektakeli. D Gschicht spiut ufeme Burehof i de 1950er-Jahr und wott rächt outentisch derhär cho. Es het veiechli Tragik drinne, wo mitem Guete vo de aute Zyte verbunge wird. Mitem nötige Schauk entschteit währendem Theater e Gschicht, wi si fasch chönt gsi si. Äuä scho nume fasch, aber daas z beurteile überlö mir am Publikum. Wes der eint oder oder di angeri a auti Gschichte, wosi het erläbt oder woner het ghört verma z erinnere, wär das schön und ou e chli z Ziu näbscht der fantastische Ungerhautig.
Aus Schouplatz dienet ke Weid, wome e Tribüni chönt härechlepfe, sondern di ganzi Glungge - jawoll, genau dää gschichtsträchtig Hof i de Wynigebärge, wo am Gotthäuf sini Ueli-Gschichte si gfiumet worde. Gottseidank mit der guldige Ungerschtützig vor Christa undem Pesche Reinhard, wo dert bure und dä wunderschön Ort hege und pflege, und üs das ermügliche. Scho dä Ort an sich würd schier länge, fürnes Bilie z choufe. Z Publikum söu aber no mänge Läckerbiss meh übercho. So isch der Afang vo de Vorstellige es Aperöli, u während de erste Szene darfme das fertig trinke u chli umeschta oder höckle, wi's eim de wou isch. Ds Theater fingt a verschidene Ort ir- und um d Glungge
...
afficher plus
Fuhrehof-Wiiber
... isch es mehrheitlich freiliechtigs Theaterstück mit läbiger Musig, Gsang, u öppedie süscheme Spektakeli. D Gschicht spiut ufeme Burehof i de 1950er-Jahr und wott rächt outentisch derhär cho. Es het veiechli Tragik drinne, wo mitem Guete vo de aute Zyte verbunge wird. Mitem nötige Schauk entschteit währendem Theater e Gschicht, wi si fasch chönt gsi si. Äuä scho nume fasch, aber daas z beurteile überlö mir am Publikum. Wes der eint oder oder di angeri a auti Gschichte, wosi het erläbt oder woner het ghört verma z erinnere, wär das schön und ou e chli z Ziu näbscht der fantastische Ungerhautig.
Aus Schouplatz dienet ke Weid, wome e Tribüni chönt härechlepfe, sondern di ganzi Glungge - jawoll, genau dää gschichtsträchtig Hof i de Wynigebärge, wo am Gotthäuf sini Ueli-Gschichte si gfiumet worde. Gottseidank mit der guldige Ungerschtützig vor Christa undem Pesche Reinhard, wo dert bure und dä wunderschön Ort hege und pflege, und üs das ermügliche. Scho dä Ort an sich würd schier länge, fürnes Bilie z choufe. Z Publikum söu aber no mänge Läckerbiss meh übercho. So isch der Afang vo de Vorstellige es Aperöli, u während de erste Szene darfme das fertig trinke u chli umeschta oder höckle, wi's eim de wou isch. Ds Theater fingt a verschidene Ort ir- und um d Glungge statt, me cha zwar hocke, aber nid überau eso gäbig. Mängisch luegt me ringer grad schtändligse zue, u angerne Orte hets de für aui es Schämeli oder öpis i deren'Art, für chli chönne d'Bei la z plampe u d Seeu la z bambele. Es isch uf au Fäu e bewegti Sach – uf der Bühni, aber o für z Publikum.
We mir vo "üs" rede, meint das der Verein "Wysstanndli-Fuhrehof Bühni". Mir si die, wo usere mira chli verruckte Idee das Theater gschribe hei, u iz die ganzi Sach lö lo über d Bühni go. Mir rede nid aui z glichlige Bärndütsch, vilech isch dir das scho ufgfaue - e Töu seit jo, der anger Tiiu siit ja, mir hi Chueleni dahiime gha u mir hei Chüe doheim, wi das i dene Ländereie, wo di Fuhrehof-Wiiber spile, äbe üeblech isch. Dert, am Ändi vo Wynige gägem Oberaargou zue, isches witume verbreitet, das hiesegi Wiibervöucher mit Herre vo angerem Bärndütsch Burscht mache, wo de när aui zäme d'Schueu gö u ploudere, wine der Schnabu äbe gwachsen'isch. Oder äi Wäg ume - dass sich hiesigi Mannevöucher mit Wiiber vo angerer Härkunft wette verbinge... hoppla, schwige! Mir wei nid z wit id Gschicht vom Theater abschweife, das wei mir nech doch eigetlech säuber la luege. Item, guet isches passiert, wöu d Liebi isch gar nid z Houptthema i däm Stück, de wüsseter das ou grad vorewägg.
www.fuhrehof-wiiber.ch
afficher moins
