Il motto da questa ediziun è «pèr a pèr»: En il center stattan pèrs litterars e multifars – da text e musica sur differentas linguas sco rumantsch e talian u ladin e tudestg fin a novs inscunters e novas publicaziuns.
Da la partida èn tranter auter Janic Maskos e Bigna Guler cun ina performanza litterar-musicala, sco era Selina Poo e Daniel Badraun cun in text interactiv e votaziuns dal public. Natiralmain na dastgan er las novas publicaziuns betg mancar: «Quatter linzöls ed üna taila» (editionmevinapuorger), «Papardets» (Nina Dazzi) e «Carschen uost» (Imelda Coray-Monn). Sco punct culminant ha quest onn lieu era la prelecziun e giuria publica dal Premi Term Bel cun in premi dal public.
La sonda saira daventa il public sez il matchmaker: A la show interactiva «Nus tschertgain il pèr perfect» cumbattan quatter pèrs ineguals a moda ludica per las pli bleras vuschs dal public. Bigliets per la sonda saira datti a la cassa da la Postremise.
La dumengia stat la litteratura per uffants e giuvenils en il center – cun prelecziuns per e cun uffants e la surdada festiva dal Premi Term Bel.
Ils Dis da litteratura han lieu ils 6, 7 ed 8 da november 2026 en la Postremise a Cuira. Il program detaglià chattais sin www.disdalitteratura.ch.
